Este sábado 9 de decembro a Casa da Cultura de Portosín vai acoller un concerto solidario de Nadal a cargo das agrupacións A Misela e Habanoia, a favor de Cáritas Interparroquial. O concerto dará comezo ás 19.30 horas. Os fondos recadaranse a través das doazóns das entradas. Poderán ser donativos ou alimentos non perecedoiros para a Obra Social de Cáritas.
A Misela é unha agrupación noiesa de música coral que centra a súa actividade nos sons iberoamericanos, poñendo o foco na música popular tanto da Península Ibérica como de América Latina.
Polo que se refire a Habanoia, é unha agrupación tamén noiesa que está constituída por un coro masculino que rende homenaxe á tradición das habaneiras e das cancións mariñeiras.
O concerto duplo a beneficio de Cáritas conta coa colaboración do Concello de Porto do Son.
