O alcalde de Dodro, Xabier Castro, participou os días pasados en Carballeda de Avia (Ourense) nunha xornada sobre o despoboamento do rural e os medios para reverter a situación. A xornada estaba impulsada desde a Asociación Provivienda, unha entidade sen ánimo de lucro que promove desde 1989 unha vivenda digna para as persoas. O encontro tivo lugar dentro do programa #HábitatRural.
A reunión tiña como obxectivo reflexionar sobre as barreiras e os facilitadores para recuperar as contornas rurais baixo o lema Os nosos pobos son oportunidades que cambian vidas. O proxecto busca facilitar unha vivenda a quen máis a precisa ao mesmo tempo que se promove a ocupación do espazo rural, buscando un asentamento permanente e non temporal.
O alcalde de Dodro, Xabier Castro, explica que o encontro “serviu para poñer en común os problemas de vivenda da nosa sociedade e as solucións que o rural pode aportar ao tempo que traballa para reverter o despoboamento”.
Castro engadiu que “agora que se volve a poñer o dereito a unha vivenda digna no centro do debate, e que as novas tecnoloxías permiten a descentralización do traballo, o rural ten unha oportunidade de facerse protagonista e Dodro ten que estar aí”.
No encontro participou tamén José Carlos Pérez, impulsor da aplicación móbil Aldealista que foi finalista nos premios European Technology Awards. A aplicación implica a administracións, compañías privadas, grupos e asociacións de desenvolvemento rural, emprendedores e aos propios usuarios coa finalidade de coñecer aldeas e pobos e, tal vez, mudarse a eles.
