O Concello de Ribeira vai celebrar o Samaín (este 1 de novembro e os días previos) con diversas actividades festivas en formatos diferentes. O programa comeza este domingo 29 de outubro coa inauguración do Samaín da Asociación Alfaia, ás 20.00 horas, na Carpa Municipal Multiusos da rúa de Galicia, e prosegue ao día seguinte, luns 30, cunha exposición de monstros no mesmo emprazamento, entre as 17.00 e as 20.00 horas, que tamén se poderá visitar ao día seguinte no mesmo horario.
O martes a partir das 19.00 horas celebrarase na carpa do porto (Malecón) unha sesión espantamedos, un obradoiro de maquillaxe de terror e festa flúor (ás 20.00 horas) e unha sesión de música con Gallaecia DJ, entre as 20.30 horas e a 1.00.
O mércores 1 de novembro haberá un obradoiro de maquillaxe na Carpa Municipal da rúa de Galicia, a partir das 16.00 horas (e até as 20.00 horas).
Organizan o Concello de Ribeira e a Asociación Alfaia.
