A actividade cinexética en Galicia comezou este domingo, 15 de outubro, e prolongarase ata o 6 de xaneiro de 2024. Poderase cazar os xoves, domingos e festivos tanto de carácter estatal como autonómico.
Como xa ocorreu na tempada anterior, a de 2022, permítese, dentro das zonas autorizadas, o adestramento de cans e aves de cetrería en calquera época do ano con fins de competición.
En canto á caza menor, nas zonas libres nas que estea permitido o exercicio da caza ao contar cunha superficie continua igual ou superior a 500 ha, a cota máxima por persoa cazadora e día será dunha perdiz vermella (Alectoris rufa) e un coello (Oryctolagus cuniculus).
Nos terreos de réxime cinexético especial as cotas serán as que se establezan nos correspondentes plans anuais de aproveitamento cinexético aprobados.
Na práctica da caza menor nos terreos de aproveitamento cinexético común non se poderá cazar en grupos maiores de seis persoas cazadoras, nin cazar coordinadamente máis dun grupo. Cada persoa cazadora poderá utilizar ata un máximo de catro cans. O número máximo de cans por grupo será de 12.
Autorízase a caza da gaivota reidora común, gaivota patiamarilla, estorniño pinto, pega e choia mediante a modalidade de cetrería, tanto en terreos de réxime cinexético común como especial, durante todo o ano, excepto nos meses de abril, maio e xuño.
No que respecta a a caza maior, a celebración de monterías ou batidas, en terreos de réxime cinexético especial, requirirá a notificación previa ao servizo provincial de Patrimonio Natural cunha antelación mínima de 10 días.
Neste tipo de actividade, non poden incluírse como pezas de caza: as crías e as femias de especies de caza maior cando vaian acompañadas das súas crías, os machos inmaturos das especies corzo, cervo e gamo e os machos adultos que efectuasen o desmogue antes do peche do seu período hábil de caza.
