Un condutor sofre a amputación dos pés nun brutal accidente con envorco na AG-11 en Rianxo.
Dotación de bombeiros do Consorcio Provincial Contraincendios e Salvamento da Coruña con base en Boiro traballando en accidente na AG-11 en Taragoña, sentido Padrón no Concello de Rianxo.
O condutor e único implicado sufriu lesións en ambas pernas e foi evacuado a bordo dunha ambulancia ao Complexo Hospitalario Universitario de Santiago.
Pasaban cinco minutos das 20:30 horas da tarde do luns cando o primeiro alertador, unha persoa particular, chamou ao 112 Galicia para alertar sobre este accidente, que se produciu no quilómetro 19 da AG-11, na parroquia rianxeira de Taragoña e en sentido Padrón. Segundo explicaba, observara un coche envorcado na incorporación da autovía.
Foi outro particular que chamou nos instantes posteriores quen confirmou que o ferido saíra despedido do seu vehículo e que precisaba asistencia sanitaria urxente.
De inmediato, os xestores do 112 Galicia activaron un operativo para o que solicitaron a acción de Urxencias Sanitarias de Galicia-061, dos Bombeiros de Boiro e de Ribeira —finalmente estes últimos non tiveron que actuar—, da Garda Civil de Tráfico, da Policía Local e dos voluntarios de Protección Civil de Rianxo e dos operarios dos servizos de mantemento da vía.
Os Bombeiros de Boiro confirmaron unha vez no lugar que o home viaxaba só no seu vehículo e, a continuación, os profesionais de Urxencias Sanitarias de Galicia-061 evacuárono a bordo dunha ambulancia ao hospital compostelán.
