O premio honra a memoria do poeta de Laíño Eusebio Lorenzo Baleirón, autor dos poemarios Os días olvidados e O corpo e as sombras, ademais de ensaios e o libro de narrativa xuvenil O libro das viaxes e dos soños. Baleirón morreu de xeito prematuro en 1986, aos 24 anos. O premio que leva seu nome é dos máis antigos e máis queridos de Galicia, segundo confirman dende a Área de Cultura do Concello, engadindo que ao premio poden optar todos os maiores de 18 anos que non gañaran en algunha das catro edicións anteriores.
Está dotado cun premio de 2.500 euros, a edición na editorial compostelán Chan da Pólvora e o gañador terá ademais 25 exemplares desa edición. Os traballos deberán ser orixinais, non premiados en outros premios e non estar rexistrados nin total nin parcialmente.
Os poemas serán de temática libre e terán unha extensión mínima de 500 versos e máxima de 800. As bases completas poden consultarse no Boletín Oficial da Provincia do 23 de xullo pasado e na ligazón específica habilitada.
