Os concellos de Rianxo, Boiro e Lousame acollerán este mes de outubro a edición XIII do Seminario Sobre a Memoria, baixo o epígrafe Un inferno para mulleres. Celebrarase os días 6, 7 e 14 de outubro de 2023. Está organizado pola Comisión pola Recuperación da Memoria Histórica do Barbanza e a Nova Escola Galega coa colaboración do Concello de Rianxo entre outras entidades
A asistencia ao seminario require inscrición previa agás a proposta da ofrenda floral que se realizará o venres 06 de outubro, ás 19.00 horas, na zona do Castelo, onde estaba o antigo campo de concentración en Rianxo. Esta ofrenda complementarase cunha actuación musical.
O número de prazas será de 50, por orde de inscrición.
A inscrición no programa pode facerse a través da ligazón específica habilitada. O programa está dispoñíbel en liña. A axenda inclúe exposicións, conferencias, roteiros, presentacións de traballos de investigación da Revista Galega de Educación, actuacións de Os Quinquilláns e Barahunda e unha homenaxe a Xoán Xosé Fernández Abella.
