O Ateneo de Ribeira foi escenario este 12 de xullo da sinatura do convenio de colaboración entre a Asociación Empresarial Hostalaria.gal e a Asociación de Hostelería de Ribeira. O obxectivo deste acordo é fortalecer a organización do sector nas vilas e comarcas para acadar unha maior efectividade na defensa dos intereses dos hostaleiros ante as distintas administracións e entes privados.
Ademais, con este convenio os establecementos asociados de Ribeira terán acceso a numerosas vantaxes froito dos acordos que Hostalaria.gal mantén con empresas de enerxía, asesoría fiscal e laboral, equipamentos, seguros, auga, telefonía ou seguridade, entre outros moitos.
As directivas das dúas asociacións dirixíronse posteriormente ao Concello para solicitar unha cita co alcalde de Ribeira, Luís Pérez, ao que aproveitaron para saudar e co que tamén fixaron unha reunión para o vindeiro 8 de agosto na que se tratarán asuntos xerais que afectan ao sector.
