O novo Goberno local de Rianxo quere estar preto da xente, tal e como manifestaron repetidamente os seus representantes antes, durante e despois das recentes eleccións municipais, e froito desta arela (do obxectivo de “escoitar ás veciñas e veciños, sentilos máis preto e darlles voz”) veñen de pór en marcha unha liña directa de comunicación cidadanía-Concello. Fano a través do número 607 77 46 33, a través do cal a veciñanza poderá facer chegar mensaxes con indicación de incidencias e queixas. Mediante este servizo, as rianxeiras e rianxeiros tamén poderán enviar suxestións e consultas aos membros do Goberno municipal.
A través desta liña non se atenderán chamadas telefónicas, dado que unicamente será empregada para a prestación do servizo sinalado. Neste punto, o Goberno local lembra que para chamar ao Concello de Rianxo, así como a calquera dos seus departamentos, cómpre dirixirse aos teléfonos que se recollen no directorio que aparece na páxina web municipal, www.rianxo.gal.
.