A dotación de garda do parque comarcal de Bombeiros de Boiro e unha patrulla da Policía Local de Rianxo foron mobilizados este mediodía ata o lugar rianxeiro de Xogo dos Bolos para rescatar de dúas crías de gaivotas que, posiblemente debido ao vento que soprou durante a noite, caéronse dun niño nunha zona de maleza dunha leira.
A agresividade dunhas gaivotas ante as persoas que nese momento se atopaban no lugar, situada nas proximidades da praia de Tanxil, chamou a atención entre os veciños. Tanto, que decidiron chamar aos bombeiros para ver se estes podían solucionar o problema.
Os bombeiros de Boiros metéronse entre a maleza para localizar e proceder ao rescate desas crías de gaivota. Despois de sacar a esas aves dese lugar, ambas foron introducidas nunha caixa e entregadas á Policía Local de Rianxo, que realizou as xestións co Centro de Recuperación de Fauna Salvaxe de Oleiros, na Coruña, para que o seu persoal acuda a recollelas.
Cedida
