Comezou a conta atrás para o inicio dunha das máis relevantes celebracións da vila de Noia e da nosa comarca: a Feira Medieval. Segundo confirmou a Área de Cultura municipal que dirixe José Pérez, a vixésimo cuarta edición da Feira Medieval celebrarase os días 14, 15 e 16 de xullo.
O edil tamén compartiu nas redes o cartel oficial desta nova edición e confirmou que nos vindeiros días anunciarase dende o seu departamento toda a programación que se desenvolverá polas rúas de Noia durante estes 3 días de celebración da historia e a cultura locais.
Entre as actividades que non van faltar atópase o mercado medieval (con numerosos postos de gastronomía e artesanía local e de Galicia), as exhibicións de cetrería, os torneos, as ruadas, as actuacións musicais, o teatro e a zona de xogos para a rapazada.
