A praia de Broña conta dende o pasado sábado 24 de xuño cun servizo de socorristas, logo de que o Concello culminara a contratación de cinco profesionais, financiados pola Consellería de Promoción de Emprego e polo propio concello, e que estarán en activo até o 17 de setembro. Deste xeito iníciase a tempada de verán no principal areal do termo municipal outense, que é tamén unha das praias máis con máis afluencia en toda a comarca.
O alcalde en funcións, Manolo González, sinalou que este ano se conseguiran cubrir todas as prazas ofertadas e se superaran os problemas do ano anterior, onde só se cubriran dúas prazas das ofertadas. Neste sentido, subliñou tamén que a Xunta de Galicia debería facilitar o acceso ás titulacións necesarias para os aspirantes a socorristas profesionais, e evitar así as tensións que viven os concellos ano tras ano para dotar deste servizo aos seus areais.
