Esta semana comeza un dos grandes acontecementos culturais do Barbanza e sen lugar a dúbidas un dos máis singulares do panorama galego: o Encontro Internacional Zona da Zanfona en Rianxo, un evento que cumpre as dezanove edicións ininterrompidas desde 2004 organizado por aCentral Folque e promovido desde o Concello de Rianxo. Esta nova convocatoria celébrase entre o venres 30 de xuño e o domingo 2 de xullo. Polas anteriores edicións teñen pasado os nomes máis senlleiros da escena europea na práctica instrumental da zanfona nas últimas dúas décadas.
Zona da Zanfona é en palabras da organización “o festival da manivela musical, da revolución silenciosa e mecánica do arco infinito, combinando programación de actividades para o público xeral e o especializado”. Haberá concertos, cursos e convivio arredor da zanfona. A axenda comeza o venres 30 de xuño na praza Rafael Dieste ás 21.30 horas (con Sangre de Muérdago e Ben Grossman) e prosegue o sábado 1, no mesmo lugar e á mesma hora, con Cantometrics e David Bellas e Iván Abal. O domingo haberá diversas actividades no Pazo de Rianxiño: o Palco Aberto ZdZ a partir das 12h, unha Mostra de Escolas de Zanfona, o Xantar ZdZ e a presentación do Manual galego de zanfona con Suso Vaamonde, ás 17h.
Tamén haberá actividades formativas con Óscar Fernández (de iniciación, o venres 30 a partir das 16h), con Vítor Soto (intermedio, venres 30 en horario de 16-20h) e con Ben Grossman (avanzado, o sábado 1 en horario de 10 a 19h). A maiores celebrarase un obradoiro de construción de zanfonas con Suso Gestal e Ariel Ninas (o sábado 17 e domingo 18 xuño, de 10 a 20 horas).
