O Concello de Rianxo vén de asinar coa empresa Construciones ANSPAL a execución do proxecto de construción dun ascensor para o Centro Cultural de Taragoña e outras melloras no edificio. O proxecto forma parte do Plan Provincial de Cooperación ás obras e servizos de competencia municipal.
Este proxecto conta cun orzamento total de execución por contrata de 98.343,17 €. Destínase á mellora da accesibilidade global do edifico que non dispoñía de facilidades para ao acceso de persoas con discapacidade e “a partir desta actuación poderán acceder ás dúas plantas do Centro Cultural”, explican fontes do Goberno local en funcións, engadindo que “estes traballos axudarán á revitalización do espazo ao facilitar o uso de toda a instalación para todas as persoas, incluídas as aulas de alfabetización de adultas do Concello que alí viñan acudindo”.
O prazo de execución é de 3 meses. A execución do contrato comenzará coa sinatura da acta de comprobación do trazado en planta. Preténdese realizar as obras durante o verán, ao remate do curso escolar da Unitaria Rosalía de Castro e rematalas antes do novo inicio “para non molestar a actividade docente”, engade o Concello.
