Momboi, unha banda noiesa de pop-rock en galego con influencias de estilos latinoamericanos, foi unha das agrupacións gañadoras dos Premios Martín Códax da Música (10ª edición), na categoría de pop e indie. Segundo fan saber os integrantes do grupo nun comunicado compartido nas redes, “estamos moi orgullosos deste premio, só con ver os nomes dos proxectos finalistas sabemos da magnitude deste recoñecemento”. E engaden: “Agradecemos e compartimos este recoñecemento con toda a xente que traballou con nós ao longo destes catro anos, porque sen as súas ilustracións, deseño gráfico, vídeo-clips, gravacións, cartelería, fotos, etc non sería posible acadalo”. Tamén agradecen o importante labor da produtora creativa Urdime.
Gala e palmarés
A festa das músicas e músicos de Galicia da gala dos Martín Códax recoñeceu co premio honorífico a Luz Casal e na categoría de Aresta Emerxente ao pianista e compositor Sergio de Miguel. Nas quince categorías artísticas dos Martín Códax subiron a recoller o premio Arrhythmia, Su Garrido Pombo, Udra, Terrae, Quico Comesaña Grupo, Ailá, Ton Risco e Marcos Teira, Banda de Música Cultural de Salceda, Moura, Sila Lua, Orquestra A Oca Band, Mario G. Cortizo, David Regueiro Trío Ft. Alexandre Cavaliere, Momboi e Pillaband. Os Premios Organistrum foron para a Sala Rebullón de Mos, na categoría de Salas, Galiciantunes na categoría de Proxectos de Comunicación, e a Foliada da Fonsagrada, na de Festivais.
A gala foi dirixida e presentada polo dúo Vaguidades, que forman os actores Isabel Risco e Fran Rei, que, caracterizados como Rosalía de Castro e Eduardo Pondal, articularon un espectáculo ao redor do viño que se puido seguir a través da web dos premios.
Na recta final da gala, a xunta directiva de Músicas ao Vivo tomou a palabra previamente á entrega do galardón honorífico 2023 a Luz Casal, en palabras do xurado “unha das voces máis valoradas deste século na escena europea”, e que subiu ao escenario para recollelo como colofón á gala.
A directiva de Músicas ao Vivo quixo recoñecer “a riqueza, delicadeza e inconformismo como intérprete e compositora” que caracterizan a traxectoria da artista nada en Boimorto.
PROXECTOS GALARDOADOS 10.º PREMIOS MARTÍN CÓDAX DA MÚSICA
Metal e heavy: Arrhythmia
Canción de autor/a: Su Garrido Pombo
Blues, Funk e Soul: Udra
Electrónica: Terrae
Folk: Quico Comesaña Grupo
Música Tradicional: Ailá
Músicas do Mundo e Mestizaxe: Ton Risco e Marcos Teira
Bandas de Música Popular: Banda de Música Cultural de Salceda
Rock e punk: Moura
Músicas urbanas: Sila Lua
Orquestras, Grupos e Música de Verbena: Orquestra A Oca Band
Música Clásica e Contemporánea: Mario G. Cortizo
Jazz e Músicas Improvisadas: David Regueiro Trio Ft. Alexandre Cavaliere
Pop e indie: Momboi
Música Infantil: Pillaband
Artista Emerxente:
Sergio de Miguel
Premios Organistrum:
Salas: Sala Rebullón
Proxectos de Comunicación e Difusión: Galiciantunes
Festivais: Foliada da Fonsagrada
Honorífico 2023: Luz Casal
