Unha das cousas boas do espírito do Festival Rock in Rian de Rianxo, entre outras moitas, é a súa capacidade para saír de si mesmo e desestacionalizarse do verán. Sen ir máis lonxe este venres soubemos dos detalles do cartaz que preparan os organizadores do certame para a festa rianxeira do Fin de Ano, propoñéndonos unha maneira moi interesante de festexar este punto de inflexión entre un ano e outro: con alfombra vermella, actividades festeiras todo o día e moita música de baile, de madrugada, baixo carpa.
O eixe principal de actividade será na praza de Castelao, e comezará ás 9.00 horas con bombas de palenque e ás 10.00 cunha ruada con gaiteiros pola vila de Rianxo. As actividades proseguirán ás 12.00 coa misa en Santa Columna e ás 19.00 horas coa despedida do ano con música de baile. Está previsto abrir a carpa festeira á 1.00 horas, logo dos festexos familiares de Aninovo de cada quen. A música correrá a cargo de DJ Firius e DJ Sasi. Como dixemos, organizan os responsábeis do Rock in Rian en colaboración co Concello de Rianxo e Bandín Audio.
