Unha decena de concellos (Ribeira, A Pobra do Caramiñal, Boiro, Rianxo, Noia, Porto do Son, Lousame, Serra de Outes e Muros) marcan a contorna máis coñecida da Serra do Barbanza, significada polìticamente coas cores azul, roxa e azul celeste para se referir ás formacións do PP, PS de G-PSOE e BNG que, en total, acadaron 109 escanos na suma dos concellos citados após o reconto de votos efectuado nas derradeiras horas do pasado domingo, 28 de maio, cando se celebraron as eleccións municipais na Comunidade Autónoma de Galicia e o restgo do Estado español. Este resultado outorga a maioría ao PP (57 concelleiros), seguido de 30 do PS de G-PSOE e 24 do BNG, amén doutras candidaturas menores cuxa presenza nas novas corporacións municipais han ser determinantes para a conformación das maiorías de goberno en moitos casos.
Se ben é certo, como xa informaba este xornal, que o Partido Popular gañou na maioría dos concellos barbanzáns (Ribeira, A Pobra, Noia, Porto do Son, Lousame, Outes e Muros), o axustado dalgúns resultados obrigarán a pactos nestes e outros municipios, feito que evidencia que a denominada “marea azul” non “cubre” totalmente o caladoiro “roxo” dos socialistas e o azul celeste nacionalista cunha diferencia entre estes dous últimos e os primeiros de tan só tres edís: 57-54. Esta aproximación vai obrigar a exhaustivas negociacións porque, a máis, está en xogo a representación provincial nunha Deputación cuxa corporación vai ser conformada novamente en base a un pacto entre socialistas e nacionalistas galegos.
