Os traballos despregados este luns 22 de maio no porto de Ribeira, encamiñados a atopar a arma de fogo empregada no intento de homicidio acontecido na madrugada deste domingo na cidade, remataron finalmente sen éxito. Os labores comezaron ás 10.00 horas no porto e foron coordinados pola Policía Nacional, contándose coa presenza activa de buzos do devandito corpo (unidade subactuática). As tarefas remataron arredor das 13.00 horas e focalizáronse entre a contorna comprendida entre os barcos de pequeno tamaño e os de meirande envergadura.
Tres persoas detidas
Tres persoas foron detidas en Tui nas últimas horas pola agresión a un mozo de 27 anos que recibiu dous disparos e foi acoitelado dúas veces na madrugada deste domingo na capital barbanzá. Segundo fontes oficiais dous dos detidos o foron acusados por tentativa de homicidio e o outro por encubrimento.
O suceso, tal como recollemos en Obarbanza.gal aconteceu sobre as 2.30 da madrugada na rúa Diego Delicado, mais coñecida como a vella rúa de Correos, a esa hora un particular foi quen deu aviso ao Servicio de Emerxencias 112 Galicia tras escoitar un disparo nesta céntrica rúa de Ribeira. O ferido foi trasladado ao Hospital do Barbanza e posteriormente foi derivado ao Complexo Hospitalario Universidade de Santiago de Compostela.
No operativo tamén participaron axentes da Policía Nacional e Local. Precisamente, fontes policiais confirmaron que o mozo, de orixe marroquí, recibiu coiteladas e un disparo.
