O Concello de Ribeira acaba de adxudicar a demolición dun edificio no lugar de Campos, na parroquia de Carreira, o que supón “o primeiro paso para materializar o proxecto destinado a suavizar a coñecida como curva da Muiñeira a través dunha modificación do trazado que afiance a seguridade viaria”, explicaron fontes do Goberno local, engadindo que o inmóbel obxecto de derrube, de planta baixa e de dous andares altos, é o que se corresponde co número 28, que foi adquirido polo Concello.
Os traballos van ser realizados pola entidade Demoliciones Coruña, S.L. O contrato supón un importe de 42.801 euros, IVE incluído.
Cómpre lembrar ao respecto que o Concello obtivo unha axuda do Fondo de Cooperación do Instituto Galego de Vivenda e Solo para reordenar este espazo público a través da demolición deste e outros inmóbeis nesta curva, “unha das máis complicadas do termo municipal”. A axuda tamén inclúe o derrubo doutros dous edificios que constitúen un funil de mobilidade na parte alta da rúa Romero Ortiz.
