A dirección do Partido Barbanza Independente, con sede en Ribeira, presentou estes días as persoas que van integrar a listaxe electoral da agrupación, que é o equipo co que se presenta ás vindeiras eleccións municipais, convocadas este mes de maio. Trátase dunha listaxe igualitaria de 28 integrantes, 15 homes e 13 mulleres, entre os que se atopan, a xeito de grandes novidades, Sabela Pensado Parada, doutora especialista en Medicina Física, Fernando Abraldes Pérez, oficial de máquinas e profesional da pesca dende 1993, Juan Luis Furones Ramos, médico no Hospital do Barbanza e o artista Paco Casal.
Polo que se refire ao programa do PBBI, fundaméntase no seguintes piares: redución de tramites burocráticos e taxas na aperturas de novos negocios; melloras na iluminación en todo o ámbito municipal, facendo mais accesíbel a comunicación de fallos na subministración por parte da veciñanza; crear unha Ribeira mais accesíbel; estudar formas de mellorar o trafico en Ribeira facendo fincapé na zona do dique; fortalecer a rede de saneamento, facilitando as conexións á rede principal; elaborar plans para a soidade non desexada dos nosos maiores; mellorar liñas de autobús entre parroquias e acceso ao hospital, maior información en paradas con información dixital de chegadas e abaratamento de billetes; promoción de portelo único de atención cidadá; creación dun punto de información catastral no Concello; eliminación de obstáculos en zonas peonís, como postes ou contedores mal situados e en calzadas; reducir o IBI a familias numerosas ou con persoas en situación de dependencia; reducir o imposto de rodaxe; xestion polideportiva, mantemento de instalacións e ampliación horarios; e promoción de actividades lúdicas en diferentes lugares e parroquias.
