O xuíz do xulgado de Instrución número 1 de Muros decretou este luns pola tarde o ingreso en prisión provisional, comunicada e sen fianza do presunto parricida de 19 anos e único detido pola súa vinculación coa morte do seu pai, un home de 59 anos. Está investigado por un delito de homicidio e acolleuse ao seu dereito a non declarar.
O corpo sen vida do proxenitor, con iniciais J.M.B, foi localizado este sábado con signos de violencia. Os servizos de emerxencias recibiron a alerta ás 00:40 horas e no domicilio familiar onde estaba o corpo sen vida do empresario estaba tamén o seu fillo, con iniciais A.M.P., que foi atendido polos sanitarios e dado de alta no lugar.
A Garda Civil confirmou á primeira hora do sábado que o corpo do home tiña signos de violencia e iniciou unha investigación para esclarecer o ocorrido, no marco da cal detivo ao seu fillo. A arma aínda non se localizou.
