O Concello de Ribeira informou do inicio das obras de pavimentación e mellora da accesibilidade na rúa Monumento: unha intervención que está sendo realizada pola empresa Nemesio Ordóñez e comporta un investimento de 43.971 euros.
De acordo co proxecto técnico elaborado polos servizos municipais, os obxectivos principais residen en mellorar a seguridade viaria e a accesibilidade nunha rúa que, segundo informou o Concello, “ten un pavimento bastante deteriorado e unhas beirarrúas cuxos bordos non están rebaixados nalgúns pasos de peóns, o que dificulta o tránsito peonil, especialmente por parte das persoas con mobilidade reducida”.
Para mellorar este estado vaise estender unha nova capa de mestura bituminosa en quente previo fresado do firme actual, en tanto que as beirarrúas serán demolidas en todas as zonas onde “será preciso rebaixalas de xeito que cumpra cos requisitos de accesibilidade esixidos na normativa vixente”, engadiron fontes do Consistorio.
O prazo de execución é dun mes e medio. A actuación forma parte do Plan POS+ 2022 da Deputación.
