Cinco bandas interpretarán ao vivo os seus temas na final do XI Concurso Fran Pérez ‘Narf’ para grupos e artistas musicais da Deputación da Coruña. A cita desenvolverase o venres 22, a partir das 20.30 horas, en A Pousada da Galiza Imaxinaria, no municipio de Boiro, un espazo especialmente relacionado coa traxectoria vital e artística do músico que lle da nome ao referido certame.
Nesta ocasión, o concerto contará coa actuación das cinco bandas finalistas que foron seleccionadas da totalidade de presentadas. Mileth, Costa Escura, Rebezo, Adhara & Ritman e Rabuda terán a oportunidade de interpretar ao vivo os seus temas diante do xurado nunha actuación que contará como convidada coa banda da Pobra, Moito!. A entrada será libre ata completar o aforo.
