As constantes borrascas rexistradas na comunidade galega nos últimos días son a causa pola cal a Xunta mantén activo o Plan Especial de Risco por Inundación ante a suba do caudal nalgúns ríos.
Actualmente, os leitos que están baixo vixilancia son o río Deva, ao seu paso por As Regadas (Pontevedra), o río Tea, ao seu paso por Mondariz, Ponteareas e Bouza do Viso (Pontevedra), o río Oitaven, en Soutomaior (Pontevedra), o río Avia, en Ribadavia (Ourense), o río Arnoia, en Baños de Molgas (Ourense) e tamén a estación do Lérez.
Segundo a información recibida a través dos sistemas de control e seguimento, ao superar os limiares establecidos, estes cursos están a presentar un crecemento significativo dos caudais, polo que poden producirse enchentes puntuais.
Unha vez máis, volvemos a recordar á poboación a necesidade de incrementar a precaución, principalmente nas estradas e vías secundarias próximas de pontes ou torrentes pois a suba repentina do caudal pode provocar dificultades na circulación.
