A entidade AGADEA vai levar a cabo en Rianxo, a semana vindeira, unha xornada informativa sobre a enfermidade de Alzheimer e outras demencias neurodexenerativas, os tratamentos non farmacolóxicos e as actividades que desenvolve a entidade. Ofrecerase tamén información sobre o seu servizo de Estimulación Terapéutica e os obradoiros que realiza a entidade. A cita será no Centro Sociocultural do Auditorio de Rianxo (rúa Autores da Rianxeira) o vindeiro 15 de decembro ás 17.00 horas.
A Asociación Galega de Axuda aos Enfermos con Demencia Tipo Alzhéimer (AGADEA) é unha entidade sen ánimo de lucro formada por persoas usuarias, familiares, profesionais e voluntarios que traballan por mellorar a calidade de vida das persoas doentes de alzhéimer e doutras demencias. AGADEA está presente nos concellos de Santiago, Ribeira, Vedra, Teo e na Estrada. Nestes momentos ofrece servizo directo a preto de 500 persoas.
