Esta semana proseguen novamente as mobilizacións en Corrubedo, cuxa veciñanza, ante o risco de quedar sen atención médica estábel e continua (cos prexuízos que isto provocaría), volve manifestarse este xoves 8 de decembro para reclamar a recuperación dos servizos médicos habituais no Centro de Saúde da localidade. Será xa a cuarta concentración veciñal de protesta. O inicio está previsto a partir das 12 (a carón do Bar Stop) e agárdase acadar unha mobilización especialmente concorrida, non só por coincidir en festivo senón polo chamamento efectuado pola xente de Corrubedo para conseguir a máxima implicación e todo tipo de entidades, colectivos, agrupacións políticas e cidadáns de a pé.
