O concello de Rianxo, en cumprimento do protocolo aprobado por Patrimonio da Xunta de Galicia, está a acometer limpezas das zonas de maior interese arqueolóxico do Concello. Un protocolo coordinado por arqueólogos da empresa Tempos Arqueolóxicos abrangue tres anos e procura manter visitábeis as áreas sobre as que actúa, a vez que tamén axudará na prevención de incendios. As zonas nas que se actuará son de Comunidades de Montes de Asados, Leiro, Isorna e Burés, ademais dunha privada como os Mouchos. Os Campiños, Monte Pelotiño, Monte Picouto ou A Foxa Vella son os espazos sinalados que inclúen mámoas, petróglifos, principalmente nos que se realizan traballos manuais de desbroce para deixar despexados os accesos e a visión das pezas patrimoniais.
