A Consellería do Mar emitiu hoxe sendas resolucións polas que se retrasa o inicio da campaña de extracción de semente de mexillón en bancos naturais nas provincias da Coruña e Pontevedra ata o vindeiro 9 de xaneiro. A decisión adóptase atendendo ás consideracións sobre a situación do recurso trasladadas por distintos profesionais do sector e a un informe emitido polos técnicos do Centro de Investigacións Mariñas (CIMA), dependente da Consellería do Mar.
Ambas partes coinciden en que a mexilla existente agora mesmo no medio é de pequeno tamaño polo que a súa extracción pode ser prexudicial para o estado biolóxico da especie e, ao mesmo tempo, pode implicar dificultades no seu proceso de fixación. Ante esta situación, e previa consulta ás principais asociacións de produtores de mexillón de Galicia, decidiuse retrasar a campaña de recollida para favorecer unha explotación sustentable do recurso.
Deste xeito, as resolucións emitidas polas xefaturas territoriais da Coruña e Vigo establecen que a campaña extractiva de semente de mexillón en bancos naturais comezará o vindeiro 9 de xaneiro de 2022 e prolongarase ata o 15 de xuño, ampliando así os prazos de recollida nun período equivalente ao retraso no seu inicio.
Coincidindo con este aprazamento no inicio da extracción, o Servizo de Gardacostas de Galicia e a unidade da Policía Nacional Adscrita van reforzar a vixilancia e os controis no litoral da comunidade co obxectivo de facer cumprir a normativa e evitar a extracción irregular de mexilla. Neste sentido, a Xunta lembra que a recollida deste recurso en período non autorizado e cos condicionantes da súa situación biolóxica -constatada no informe do CIMA- podería supoñer a comisión dun delito contra a flora e a fauna de Galicia, co que os posibles infractores se enfrontan ás sancións e penas recollidas pola lexislación vixente nesta materia.
A Consellería do Mar tamén está a acometer as modificacións pertinentes para poder abrir novas zonas á extracción de mexilla mediante a correspondente resolución. Esas novas aperturas decretaranse previa análise científica e tendo en conta os informes técnicos dispoñibles sobre o estado do recurso coa finalidade de garantir unha explotación sustentable.
