O Concello de Ribeira vén de licitar as obras de pavimentación e mellora da accesibilidade na rúa Monumento en Ribeira, unha intervención que ten un orzamento de 39.926,69 euros e un prazo de execución dun mes e medio a partir da formalización do contrato.
O Concello explica que “de acordo co proxecto técnico elaborado polos servizos municipais os obxectivos principais residen en mellorar a seguridade viaria e a accesibilidade nunha rúa que ten un pavimento bastante deteriorado e unhas beirarrúas cuxos bordos non están rebaixados nalgúns pasos de peóns, o que dificulta o tránsito peonil, especialmente por parte das persoas con mobilidade reducida”.
Para poñer remedio ao devandito vaise estender unha nova capa de mestura bituminosa en quente previo fresado do firme actual, en tanto que as beirarrúas serán demolidas en todas as zonas onde será preciso rebaixalas de xeito que cumpra cos requisitos de accesibilidade esixidos na normativa vixente.
As empresas interesadas dispoñen ata o 2 de decembro para presentar as súas ofertas a través do Sistema de Licitación Electrónica da Xunta de Galicia (SILEX).
