A parroquia ribeirense de Oleiros celebra do 2 ao 4 de setembro as súas festas en honra de San Roque, San Antonio, Virxe do Carme e o Santísimo Sacramento, e os actos terán lugar na praza do local social, recreativo e de lecer do lugar. O venres, xornada dedicada aos dous primeiros, haberá dianas e alboradas a cargo do grupo de gaitas Vos Pequenos do Barbanza, misa solemne e procesión e as actuacións de Leite con Jalletas e Planet Disco Móbil con DJ Matrek e Kike Varela.
O día seguinte, que será en homenaxe á patroa dos mariñeiros coa celebración de misa solemne e procesión, repetiranse as dianas e alboradas co mesmo grupo de gaitas, do mesmo xeito que sucederá o domingo, disputarase un partido de fútbol no campo da Trinidade e pola noite amenizarán a verbena Noite de Estrelas, Fuck Poseidon e DJ Mateo Abelleira.
E para o día 4 de setembro deseñouse unha ampla e variada programación que inclúe, ademais da misa solemne en honra ao Corpus, unha festa cabalar, sesión vermú con Thais Suki, así como a celebración da sexta edición da festa da empanada, para rematar pola tarde cunha festa infantil na que haberá xogos e inchables.
