O Concello de Ribeira vén de adxudicar a creación da ruta litoral Ribeira destino litoral sostible: o mar, un patrimonio visible, formada por 17 paneis instalados entre Palmeira e Corrubedo e coa finalidade de “informar e poñer en valor o pasado, presente e futuro da pesca, o marisqueo e o patrimonio marítimo e industrial das nosas costas”, en palabras do Concello, que engade que están establecidos cinco campos temáticos que se deben cubrir por medio de textos e fotografías: paisaxe e territorio, cultura mariñeira tradicional; actividades en portos, lonxas e prazas de abastos; gastronomía mariñeira; e experiencias turísticas.
Os paneis estarán situados en Palmeira, Coroso, na lonxa e o porto de Ribeira, O Touro, Castiñeiras, praia do Castro, O Carreiro, a lonxa e o porto de Aguiño, o Peirao Fenicio, Couso, O Vilar e na vila e no Faro de Corrubedo.
Ademais, contrátase a adquisición e colocación dos paneis, nos que o material empregado será madeira de pino tratada con autoclave e impreso en vinilo laminado en soporte de aluminio, “o cal lle dá unha maior durabilidade”, especifícase.
A licitación da actuación comprendía dous lotes (fotografías, contidos e maquetación para os paneis, por un lado; e adquisición e colocación das estruturas e impresión dos contidos que van nelas, por outro) e en ambos resultou adxudicataria a empresa LAU Creacións, S.L., por cadanseus importes de 9.317 e 22.990 euros, respectivamente.
A actuación está subvencionada pola Consellería do Mar da Xunta de Galicia ao abeiro do GALP (Grupo de Acción Local do Sector Pesqueiro) Ría de Arousa.
