Este 31 de xullo celébrase unha cita na comarca que os seareiros dos mellores produtos galegos e da nosa cociña non poden deixar de lado: a Festa do Percebe de Aguiño, que chega á súa 23 edición cun novo e importante recoñecemento, o de Festa de Interese Turístico Galego. As actividades terán o seu epicentro no porto da vila mariñeira, a partir das 12.00 horas. No capítulo de novidades, a celebración deste ano inclúe un novo prato co logotipo da festa e cun epígrafe inscrito que fala ás claras da importancia do produto: “O Rei do Mar, Percebe de Aguiño”. Neste “ano de reinicio”, logo das parénteses da COVID, distinguirase como percebeiro de honra ao artista local Manuel Ayaso. A festa vén da man da Confraría de Carreira e Aguiño co patrocinio e colaboración do Concello de Ribeira. O cartel desta edición contén unha fotografía tomada por Luis Polo, autor do libro Percebeiros de Aguiño e tamén das imaxes que se mostran nas paredes da Lonxa local.
