O Obradoiro de Emprego en xestión forestal Torre Goiáns – Boiro, que desenvolveu o Concello de Boiro durante o curso 2021-2022, chega ao seu fin. No acto de clausura, que se celebrou esta mañá no Pazo de Goiáns, participaron o alcalde, José Ramón Romero, o concelleiro de Promoción Económica, Carlos Muñiz, o xefe de servizo de Coordinación Administrativa e Xestión Económica, Pedro Pablo Lorenzo, e a directora do Obradoiro, Lidia Santos.
Un total de 20 alumnos e alumnas participaron nesta formación que estivo dividida en dúas modalidades que se impartiron entre os meses e outubro de 2021 e xullo de 2022. Impartiuse a de Actividades auxiliares en conservación e mellora de montes e Repoboacións forestais e tratamentos silvícolas. “Decidimos apostar pola formación en forestal porque é necesario diversificar os sectores da comarca e porque temos uns espazos naturais marabillosos que poñer en valor”, afirmou o alcalde.
O alumnado contou cun contrato de traballo a tempo completo para a formación e aprendizaxe de 40 horas semanais, durante 9 meses, en horario de 7.30 a 15.30 horas. Ademais da formación teórica, o alumnado desenvolveu traballos de formación práctica no acondicionamento da finca de Goiáns e a
contorna dos castros de Neixón. “Temos un nivel de satisfacción moi alto co traballo realizado e demostrouse que en moi pouco tempo o alumnado adquiriu unhas grandes cualidades profesionais”, afirmou o concelleiro.
O Obradoiro de Emprego en xestión forestal Torre Goiáns – Boiro conta co financiamento da Consellería de Emprego e Igualdade, ao abeiro das axudas e subvencións para obradoiros duais de emprego da Comunidade Autónoma de Galicia. “Dende a Consellería seguiremos apostando por este tipo de formación para ofrecer saídas laborais en sectores que contan cunha alta demanda de emprego”, afirmou o xefe de servizo.
