O delegado do Goberno en Galicia, José Miñones, debullou este martes 21 os detalles do PIREP (Programa de Impulso á Rehabilitación de Edificios Públicos), abeirado ao Plan de Recuperación estatal, que está a permitir a mellora de 26 edificios públicos de titularidade autonómica en Galicia, 21 deles centros educativos. O programa, que vén con 27 millóns de euros transferidos do Goberno á Xunta, contempla traballos no IES da Pobra do Caramiñal, no CEIP de Frións (Ribeira) e no IES de Fontexería (Muros).
José Miñones achegou estes datos durante unha visita ao CEIP Mestre Rodríguez Xixirei, en Santiago, xunto co conselleiro de Cultura, Educación, Formación Profesional e Universidades, Román Rodríguez, a subdelegada do Goberno na Coruña, María Rivas, para supervisar as obras financiadas polo PIREP neste colexio.
“Estamos a mellorar a calidade de vida das persoas e a calidade do ensino adaptando os centros a unhas boas condicións climáticas e conseguindo un aforro enerxético de máis do 40%”, manifestou o delegado, e celebrou que “o Plan de Recuperación do Goberno chega a Galicia” e que o fai “a través la colaboración entre Administracións”.
No IES Fontexería o financiamento será de 1.441.897 €, no CEIP de Frións de 697.670 € e no IES da Pobra de 1.355.911 €.
