Este xoves 24 de outubro vaise celebrar o Día da Biblioteca, que se conmemora a nivel galego e estatal dende hai máis de dúas décadas (dende que a Asociación Amigos do Libro Infantil e Xuvenil decidiu propoñer esta xornada para destacar as vantaxes de termos acceso local aos libros e á cultura). As nosas bibliotecas municipais xa teñen preparadas actividades culturais para festexar a xornada. Se onte falamos do encontro co escritor Antón Riveiro Coello na de Boiro, hoxe informamos das celebracións na de Ribeira: a Biblioteca Municipal de Ribeira vai festexar a efeméride agasallando un libro ás usuarias e usuarios que visiten o espazo de empréstamo e lectura na devandita data.
O Día da Biblioteca está especialmente adicado ao público infantil e xuvenil. A proposta desta celebración veu da man da dita asociación, en recordo da destrución na Biblioteca de Saraxevo en 1992, e foi apoiada no seu día polo Ministerio de Cultura. Esta conmemoración naceu para “trasladar á opinión pública a importancia da biblioteca como lugar de encontro dos lectores de todas as idades coa cultura, e como un instrumento de mellora da formación e a convivencia humana”. A xornada celébrase a nivel galego e estatal e acompáñase dun pregón que se difunde en todas as bibliotecas de España.
