A Brigada Municipal de Obras de Ribeira iniciou esta semana os traballos para proceder á terceira fase da renovación integral do pavimento na rúa Manzanares, situada no histórico barrio de Bandourrío. Ao abeiro destes labores estanse a substituír as lousas de granito da capa de rodadura por un máis resistente formigón pulido, “acorde con zonas próximas do casco urbano da cidade”, segundo indicou o Concello, que lembra que esta renovación principiou hai dous anos nunha primeira fase entre as prazas de Compostela e de Pontevedra, continuando o ano pasado con outros 85 metros lineais ademais de acondicionar esta última praza. Agora empréndese un novo treito de aproximadamente un cento de metros ata chegar á altura das escaleiras da rúa Perú.
