A comunidade musulmá en Ribeira está a vivir a súa festa de Eid-al-Fitr que pon fin ao Ramadán e con motivo desta festividade convidaron ao alcalde de Ribeira, Manuel Ruiz, xa que por primeira vez poden celebrar conxuntamente as súas oracións na Carpa Multiusos cedida polo Concello.
Dende esta comunidade, con maioría marroquí pero con presenza tamén doutros países como Mauritania ou Senegal, agradeceron ao Concello e ao alcalde tal deferencia.
Pola súa parte, Manuel Ruiz manifestou o seu agradecemento pola implicación desta comunidade na sociedade ribeirense, que “representa unha parte importante da economía local e que contribúe ao agradecemento do noso pobo”. Así mesmo, expresou o compromiso deste Concello de seguir traballando para a súa integración.
No evento estiveron presentes tamén representantes de Cáritas Ribeira e de ICE Renovación, o cal segundo afirmou o alcalde tamén é un motivo de orgullo “ao reflectir a perfecta sintonía entre crenzas diferentes cun mesmo obxectivo: mellorar a vida do pobo e a dos demais”.
