A Pobra acolle dende hoxe na súa Casa da Cultura e Xuventude Raquel Fernández Soler a mostra de Retratos emocionais, da artista Marcela Morono. Trátase dun conxunto de trinta obras que lle serven á autora para facer o seu debut no mundo das exposicións pictóricas, algo que, segundo apuntou, “levoume 60 anos conseguir…e, ao final, logreino.”
Pola súa banda, a concelleira de Cultura, Patricia Lojo (PSdeG-PSOE) salientou que se trata dunha exposición “chea de sensibilidade” na cal cada un dos cadros reflicte unha emoción, algo significativo para a artista.
En canto á técnica, predomina o óleo e o acrílico, e as escenas representadas inspíranse en situacións sociais e persoais, cancións, etc. No que respecta á temática, esta resulta variada, con predilección pola muller e a natureza.
Engadir que esta mostra permanecerá na casa da cultura da Pobra deica o día 25 de marzo e as visitas pódense realizar de luns a venres, en horario de 11.00 a 13.30 e de 17.00 a 20.00 horas.
