O Concello de Boiro, a través da Concellería de Cultura, impulsa esta tempada, nos centros de ensino do municipio, o proxecto En(clave), un plan integral en materia de educación, igualdade e saúde. Unha das actividades que engloba este programa é un obradoiro de emocións que ten como finalidade a saúde emocional.
Segundo explica o Concello, a actividade “ten como eixos transversais o autocoñecemento do corpo, a xestión das emocións, o bo trato e a autoestima, traballados a través da comunicación asertiva, a posta de límites e a negociación para garantir as relacións desexadas e libres de coacción e violencias”.
Mediante esta actividade realízanse charlas e coloquios divulgativos centros de ensino; traballo co alumnado para proporcionar información e ferramentas para traballar a saúde emocional co alumnado; e dotar desta mesma información tamén ás familias.
Dende a Concellería de Cultura engaden que “tras o confinamento por pandemia deuse un agravamento de síntomas como a ansiedade, a depresión, o trastorno de estrés postraumático, problemas coas emocións, condutas destrutivas, maiores dificultades sociais, baixo rendemento escolar, etc”. En palabras da edil María Outeiral, “o aumento preocupante destes comportamentos en nenos e nenas fai necesario que se comece a traballar na súa prevención dende os centros de ensino”.
Deste xeito, engade Outeiral, o proxecto En(clave) nace “da necesidade de dar resposta á demanda dos centros educativos de traballar sobre accións relacionadas coa igualade de xénero, a saúde mental ou a convivencia para impulsar un cambio de valores, roles e estereotipos”.
Este proxecto engloba tres grandes áreas de traballo que son a igualdade e sensibilización social; a educación e prevención e a saúde e benestar.
