O Concello de Ribeira vén de sacar a licitación a instalación dos servizos de saneamento e abastecemento de auga no lugar das Lombas, na parroquia de Palmeira. A actuación vén cunha contía de 206.774,49 euros.
No dito lugar instalarase unha tubaxe SN4 de 315 milímetros de diámetro e 578 metros de lonxitude, ademais de 23 pozos de rexistro. A través do colector levaranse as augas residuais por gravidade ata o punto máis baixo do trazado, onde se instalará un pozo de bombeo. De aquí as augas impulsaranse por outra tubaxe, neste caso de polietileno de alta densidade de 549 metros de longo e 90 milímetros de diámetro, ata a súa conexión coa rede xeral.
Para as obras de abastecemento instalarase unha canalización de 500 metros de longo e 75 milímetros de diámetro, xunto con dúas válvulas de composta, dúas válvulas de baleirado e dúas ventosas.
A actuación está enmarcada no POS+21 e ten un prazo de execución de cinco meses.
As empresas interesadas en presentar ofertas dispoñen ata o 14 de febreiro á medianoite a través do Sistema de Licitación Electrónica da Xunta de Galicia (SILEX).
