20190927. O Concello de Ribeira realizou esta mañá unha intervención no paseo do Malecón co obxectivo de reordenar un tramo de prazas de aparcamento a petición de dúas organizacións sociais que desempeñan o seu labor na contorna e, concretamente, no edificio coñecido popularmente coma a ‘Caixa de Aforros’. Trátase de AGADEA, que xestiona o Centro de Día de Alzhéimer, e a fundación Faibén de apoio á infancia, responsable dunha casa de acollida para menores pertencentes a familias desestruturadas.
Concretamente, operarios municipais procederon a habilitar unha praza en exclusiva para a fundación Faibén “coa fin de atender as necesidades desta entidade”, mentres que, recollendo unha solicitude expresa de AGADEA, habilitáronse dúas prazas express por tempo limitado a quince minutos para que os usuarios do centro e a cidadanía en xeral poidan facer uso das mesmas. Desde o Concello sinalan que AGADEA xa ten ademais outras tres prazas reservadas ao seu servizo.
