Seis persoas resultaron feridas e necesitaron ser trasladadas, a última hora da pasada tarde, despois de colidir dous turismos, no concello de Dodro.
Arredor das 18:45 horas, o 112 Galicia recibiu o aviso, por parte dos servizos sanitarios, dun choque que se acababa de producir no lugar de Imo, parroquia de San Xoán de Laíño, e confirmábase que nel había persoas atrapadas.
Decontado, os operadores do CIAE-112 Galicia mobilizaron aos Bombeiros de Boiro, aos membros do GES de Padrón e aos axentes da Garda Civil de Tráfico.
Xa desde o lugar do sinistro, o GES de Padrón confirmoulle ao 112 que non había ninguén atrapado no interior dos vehículos e que resultaran feridas seis persoas que foron trasladadas. Pese a non ser necesarias as labores de excarceración, os Bombeiros de Boiro axudaron a retirar a un dos feridos do coche no que se atopaba.
