O Grupo Municipal Socialista de Noia rexistrou para o seu debate no pleno deste xoves unha moción para a mellora da iluminación na vila. A agrupación considera que a redución do consumo no cambio de luminarias por novas tecnoloxías sustentábeis “é un cambio necesario que se está a levar a cabo na maioría dos concellos, pero non debe acontecer que este cambio implique ter unha iluminación deficiente como está acontecendo nalgúns lugares de Noia”.
Os socialistas , neste senso, alertan de que nas últimas semanas están a recibir queixas e consultas da veciñanza, que considera que hai rúas que “non teñen unha iluminación mínima para poder percorrelas cando cae a noite”. Neste grupo de emprazamentos pouco iluminados encádrase, segundo enumera o PSOE, contornas como poden ser a Alameda, os malecóns ou o paseo marítimo, a maiores do Campo de Fútbol, “un lugar moi percorrido en horas nocturnas polas actividades deportivas que se realizan polas tardes”.
O voceiro socialista Roberto Iglesias indica que “é evidente que hai rúas que perderon moita luminosidade ca substitución de luminarias por lámpadas LED, ao non levar a cabo as modificacións precisas nas luminarias, como a instalación de cristais para mellorar a expansión da luz que emiten. Non pode ser que a cidadanía deixe de ir por determinadas rúas porque carecen da luz mínima para transitar por elas”.
Os socialistas solicitan identificar as contornas que actualmente non teñen a iluminación suficiente, e posteriormente realizar as accións precisas para mellorala, coa instalación de cristais ou reflectores nas luminarias actuais, ou complementándoa con novos puntos de luz.
