O alumnado do Obradoiro de Cociña O Pote II mantivo este 2 de novembro unha xuntanza interxeracional con nove usuarias do Centro de Día de Alzhéimer de Ribeira que xestiona a asociación AGADEA. A actividade consistiu na elaboración dun menú proposto polas propias usuarias do centro. Elas foron as encargadas de supervisar o cociñado e de falar ao alumnado de como se preparaban estes pratos antigamente.
Charla sobre nutrición
Por outra parte, e no marco das actividades que se están a desenvolver no treito final de O Pote II (que rematará o próximo 14 de novembro), este xoves 4 entre as 9 e as 11 horas celebrarase unha charla de Ana Rodriguez Sampedro (farmacéutica comunitaria en A Pobra, especialista en nutrición e experta universitaria en saúde pública) que terá como obxectivo que o alumnado afonde nos conceptos básicos sobre os macro e micronutrientes, as racións recomendadas, o prato de Harvard, os cambios que sofren os alimentos coas diferentes técnicas culinarias e unha práctica sobre a selección dos alimentos dependendo do grupo ao que pertencen e a elaboración dun menú semanal equilibrado.
