A Asociación Cultural Barbantia, o selo literario Medulia Editorial e a Sociedade Liceo de Noia organizan este vindeiro venres a presentación do libro De mariño a poeta de Manel Monteagudo (Noia, 1957). Será o 24 de setembro ás 20.30 horas na Sociedade Liceo de Noia (rúa Alameda, s/n) Intervirán no acto, amais do autor, Xerardo Agrafoxo (historiador e escritor), María Xesús Blanco (profesora e escritora), Antón Riveiro Coello (escritor) e Óscar Prego (presidente da Sociedade Liceo de Noia). A entrada será libre até completar cabida. Será obrigatorio o uso de máscara.
De mariño a poeta é o terceiro libro do mariño e escritor noiés Manel Monteagudo, que obtivo un importante recoñecemento con Camiño á lagoa dos bardos, un libro de marcada vertente social no que, a longo de preto de cincocentas páxinas, o autor púxose en pé de loita contra algúns dos principais abusos de poder que se perpetran na actualidade en calquera das súas moitas manifestacións. Neste seu novo libro Monteagudo aposta polo formato de prosa poética para falar “fundamentalmente do mar”, tal e como puxo de manifesto na presentación previa de De mariño a poeta celebrada en Vigo, na compaña dos escritores Antonio García Teixeiro e Inma López Silva, e por Francisco Castro, director de Galaxia.
