O alcalde de Ribeira reuniuse este 23 de agosto cunha representación de practicantes de pesca deportiva do municipio, preocupados polo que entenden “excesivas limitacións para o desenvolvemento desta actividade de ocio nas zonas portuarias”.
Os usuarios manifestaron a Manuel Ruiz que “entenden a necesidade de que os traballadores profesionais exerzan o seu labor sen ningún tipo de obstáculo”, mais consideran que “é preciso flexibilizar as restricións establecidas á hora de levar a cabo unha actividade que non ten ánimo de lucro e goza dun alto número de usuarios, sobre todo entre a mocidade e entre as persoas xubiladas”.
Así mesmo, informan de que levan xa máis de 600 sinaturas recollidas. O alcalde comprometeuse a concertar unha cita na Consellería do Mar e acompañar ao colectivo para trasladar as súas inquedanzas e propostas.
