20190906 O Ateneo Valle-Inclán de Ribeira vai acoller hoxe unha nova presentación editorial: unha actividade que non fai máis que confirmar o papel referente do club literario-cultural da praza de Compostela a nivel de estreas libreiras galegas e estatais. Desta vez é a quenda da escritora Mercedes Barreiro, que vai dar a coñecer a súa novela autoeditada Lo que tú digas, corazón. A cita é este venres ás 21 horas, na sede do Ateneo (Bar Plaza).
Lo que tú digas, lanzada este ano ao mercado editorial, nárranos a historia de Mónica, unha muller que rolda os 50 anos e está casada co que considera o home “ideal”, amais de ser nai de dous fillos. Porén, descobre que non pode deixar de sentir atracción polas mulleres e inicia “un paseo sen ancoraxes, cargado de medo, paixón e dor, pero sobre todo de amor”, segundo se fai saber na presentación editorial nas redes. O libro, unha novela curta (de algo máis dun centenar de páxinas), fálanos polo tanto da necesidade de sermos coherentes, sinceros e ter afouteza “para vivir co corazón”.
