A directora xeral de Administración Local, Natalia Prieto, visitou este 4 de xuño a localidade de Ribeira, onde comprobou o equipamento do que dispoñen os efectivos do servizo municipal de Emerxencias e Protección Civil, efectivos aos que a Xunta dotou o ano pasado dunha axuda de 32.000 euros para adquirir un novo vehículo destinado aos labores ambientais.
A colaboración co Concello de Ribeira enmárcase nos obxectivos do Fondo de Compensación Ambiental, ao que a Xunta destina 11 millóns de euros na convocatoria deste ano.
Natalia Prieto destacou que o novo vehículo está a ser empregado polos efectivos do dito servizo en labores de protección do medio ambiente como a prevención e extinción de incendios, o roce e o coidado do monte, a retirada de niños de vespa velutina ou de animais mortos, ademais do control dos puntos de vertidos e de especies protexidas.
Tamén lembrou que a Administración autonómica “vén colaborando nos últimos anos con Ribeira na mellora de infraestruturas como as dependencias da Casa Consistorial, ou as instalacións deportivas do municipio, así como no pavimentado de varios camiños”. Tamén colaborou na contratación de auxiliares para reforzar o corpo da Policía Local e en melloras ambientais tanto de saneamento como no acondicionamento de espazos naturais. O investimento total da Xunta no municipio a través das distintas ordes da Vicepresidencia Primeira acada supera os 910.700 euros.
