O Concello de Ribeira entregou este 26 de maio á oficina local da Cruz Vermella un cheque de 2.000 euros para servir de apoio ao seu importante labor social. A entrega formalizouse na sede da organización humanitaria no porto de Ribeira. A cita contía recibiuna o Concello de Ribeira logo de proclamarse como un dos nove municipios galegos que completaron con éxito o Únete ao reto de Ecoembes, tendo que destinalo a unha causa social.
A presidenta da delegación local da organización, Ángeles Cores (A Nena), foi quen recibiu o cheque de mans da primeira tenente de alcalde, María Sampedro. Cores agradeceu esta doazón e asegurou que con estes cartos “poderase favorecer a unhas cantas familias”.
Pola súa parte, María Sampedro manifestou que o mérito de conseguir este agasallo é principalmente da veciñanza do municipio: “A reciclaxe de Ribeira dende o ano pasado a este ano mellorou moitísimo en canto calidade e polo tanto tiñamos que dicirlle á cidadanía que iso ten premio”, declarou. Tamén eloxiou o traballo que dende fai moitos anos vén facendo Cruz Vermella en Ribeira.
Hai que recordar Ribeira foi un dos nove municipios galegos capaces de superar o reto proposto por Ecoembes e a Xunta consistente en lograr aumentar un 10% a recollida de envases no contedor marelo durante os meses de febreiro, marzo e abril con respecto ao mesmo período do 2020. Os outros oito concellos foron Arteixo, Lalín, Ourense, Ponteareas, Porriño, Sanxenxo, Tui e Viveiro.
