O Concello de Ribeira vén de facer balance da actividade xerada pola patrulla local anti-COVID dende a súa entrada en funcionamento. Segundo fixo saber, dende o inicio da súa andaina, interpuxo un total de 49 denuncias ligadas aos incumprimentos das normas sanitarias contra a pandemia no sector hostaleiro. Este balance fíxose público, en palabras do Concello, “en resposta ao comunicado remitido esta semana pola Asociación de Empresarias de Ribeira no que aludía a unha presunta inoperancia da patrulla da Policía Local encargada de velar polo cumprimento das normas nos establecementos”.
No balance o Concello fai referencia a denuncias relacionadas co ámbito hostaleiro (por exemplo, clientes que non teñen posto o cubrebocas pese a non estar consumindo, locais que exceden o seu límite de aforo, etc), sen incluír entre este medio cento de denuncias outras propostas de sanción por non respectar as normas decretadas para conter a pandemia, tales como vulneracións do toque de queda e de confinamentos perimetrais, festas nas casas ou o caso recente acontecido nun local sen uso en Bandourrío.
No comunicado o Concello de Ribeira solicitou á Asociación de Empresarios de Ribeira “que adopte as medidas máis convenientes para evitar que se produzan novos incumprimentos entre algúns dos seus asociados”.
